Një muaj paraburgim për nëntë të akuzuarit për krime lufte 

Prishtinë, 29 shtator 2026 19:11

Gjykata Themelore në Prishtinë, Departamenti Special, ka caktuar nga një muaj paraburgim për nëntë persona të dyshuar për veprën penale “Krime lufte kundër popullsisë civile”.

Sipas njoftimit të Gjykatës, masa është caktuar pas kërkesës së Prokurorisë Speciale të Republikës së Kosovës dhe pas mbajtjes së seancës dëgjimore ndaj të pandehurve me inicialet D.D., M.R., M.R., R.R., S.D., S.D., V.L., R.R. dhe D.D.

Ata dyshohen se kanë kryer veprën penale “Krime lufte kundër popullsisë civile”, të paraparë nga neni 142, lidhur me nenin 22 të ish-Ligjit Penal të ish-RSFJ-së.

Gjykata ka vlerësuar se ekzistojnë rrethana që e bëjnë paraburgimin masë të nevojshme për zhvillimin e procedurës penale. Sipas arsyetimit të saj, ekziston rreziku që të pandehurit, nëse do të liheshin në liri, mund të pengonin zhvillimin e procedurës, t’i shmangeshin ndjekjes penale ose të bëheshin të paarritshëm për organet e drejtësisë.

Një nga arsyet e përmendura nga Gjykata është fakti se të pandehurit kanë nënshtetësi dhe vendbanim në Serbi, si dhe posedojnë pasaporta të Republikës së Serbisë.

“Ekziston rreziku konkret që të pandehurit, me qëllim të shmangies së ndjekjes penale, të largohen dhe t’i ikin drejtësisë”, thuhet në arsyetimin e Gjykatës.

Përveç rrezikut të arratisjes, Gjykata ka vlerësuar edhe mundësinë që të pandehurit, nëse do të liheshin në liri, të ndikonin në prova dhe dëshmitarë, duke penguar administrimin e plotë të provave dhe zbardhjen e gjendjes faktike.

Masa e paraburgimit është caktuar në kohëzgjatje prej një muaji për secilin nga nëntë të pandehurit.