Preleviq: Hapja e dosjeve të BIA-s mund të zbulojë lidhjet mes politikës dhe krimit

Prishtinë, 14 nëntor 2026 19:29

Avokati serb Bozho Preleviq ka vlerësuar se hapja e dosjeve të Agjencisë së Sigurisë dhe Informacionit (BIA) mund të shkaktojë tronditje të mëdha politike në Serbi, duke nxjerrë në pah lidhjet e mundshme mes shërbimeve të sigurisë, pushtetit politik dhe strukturave kriminale.

Preleviq ka ngritur pikëpyetje edhe për rolin e BIA-s në rastin e vrasjes së politikanit serb nga Kosova, Oliver Ivanoviq.

Ai ka vënë në pikëpyetje nëse ish-drejtuesi i BIA-s, Marko Parezanoviq, mund të sqarojë nëse Ivanoviq ishte nën përgjim dhe vëzhgim në kohën kur u vra, si dhe kush kishte urdhëruar vendosjen e tij nën këto masa.

“Imagjinoni çfarë tronditjeje do të shkaktohej nëse do të hapeshin dosjet”, ka deklaruar Preleviq, duke përmendur edhe mundësinë e zbulimit të përfituesve të parave nga Telekomi.

Sipas tij, shërbimet e sigurisë në Serbi për një kohë të gjatë kanë funksionuar pa kontroll të mjaftueshëm institucional dhe janë përdorur për mbrojtjen e interesave të partisë në pushtet, në vend që të përmbushin misionin e tyre në shërbim të shtetit dhe qytetarëve.

Preleviq ka përmendur gjithashtu rastin e Milan Radoiçiqit dhe Zvonko Veselinoviqit, duke pretenduar se gjatë kohës kur ai shërbente në Ministrinë e Brendshme ishin iniciuar procedura penale ndaj tyre për drogë, por prokurori kishte hequr dorë nga ndjekja.

Ish-gjyqtari dhe ish-bashkëministri i Punëve të Brendshme ka kërkuar reformim të thellë të shërbimeve të sigurisë në Serbi, me mbikëqyrje efektive parlamentare dhe gjyqësore.

Ai ka paralajmëruar se ndryshimi i drejtuesve apo i emrave të institucioneve nuk përbën reformë të mirëfilltë, nëse brenda tyre vazhdojnë të funksionojnë të njëjtat struktura dhe praktika.

Sipas Preleviqit, pa reformimin e shërbimeve të sigurisë dhe shkëputjen e lidhjeve mes tyre, politikës, drejtësisë dhe mediave, Serbia nuk mund të arrijë ndryshime të qëndrueshme demokratike.