Serbia vazhdon të mos bashkëpunojë për të zhdukurit

Prishtinë, 14 nëntor 2026 09:10

Komisionit Qeveritar për Persona të Zhdukur, Agron Limani, është shprehur skeptik se ndryshimi i pushtetit në Serbi dhe fitorja e Listës Studentore do të sjellin ndryshim të qasjes së këtij shteti ndaj çështjes së personave të zhdukur gjatë luftës në Kosovë.

Limani ka thënë se deri më tani përfaqësuesit e Listës Studentore nuk kanë dhënë ndonjë qëndrim të qartë lidhur me këtë çështje, ndërsa deklarimet e tyre për Kosovën nuk japin shumë shpresë për ndryshime pozitive.

Ai ka kërkuar që qeveria e re në Serbi të shkëputet nga politika e deritanishme e udhëhequr nga Aleksandar Vuçiqi dhe të zbatojë zotimet e marra në vitin 2023, veçanërisht atë për qasje në arkivat e forcave serbe.

Sipas Limanit, pikërisht në dokumentacionin e ushtrisë dhe policisë serbe mund të gjenden informacione vendimtare për zbardhjen e fatit dhe lokacioneve të personave të zhdukur.

Ai ka kujtuar se bashkëpunimi i autoriteteve të mëparshme serbe ka qenë i dobët, pavarësisht premtimeve të dhëna në takime dhe forume ndërkombëtare.

“Përvoja jonë me qeverinë e kaluar ka qenë jashtëzakonisht pesimiste ose jo e mirë, për faktin se aspak nuk janë treguar kooperativë në çështjen e personave të zhdukur”, ka deklaruar Limani.

Ai ka theksuar se presioni ndërkombëtar mbetet i domosdoshëm për të siguruar bashkëpunimin e Serbisë, pasi, sipas tij, ky shtet nuk ka ofruar bashkëpunim konkret në mungesë të trysnisë nga faktori ndërkombëtar.

Limani ka bërë të ditur se aktualisht në Kosovë figurojnë 1 mijë e 555 persona të zhdukur nga lufta e fundit.

Ai gjithashtu ka akuzuar autoritetet serbe për kërcënime ndaj personave që mund të kenë informacione për fatin e të zhdukurve, duke vlerësuar se deklarimet e deritanishme të zyrtarëve serbë nuk janë shoqëruar me veprime konkrete.

Kryesuesi i Komisionit Qeveritar ka shprehur shpresën që qeveria e re në Serbi të ndryshojë kursin politik dhe të mos vazhdojë me qasjen penguese të paraardhësve të saj.

Megjithatë, ai ka thënë se zhvillimet dhe deklarimet e deritanishme nuk japin arsye për optimizëm lidhur me zgjidhjen e kësaj çështjeje humanitare.