Qindra dronë godasin Moskën në ditën e fundit të votimit në zgjedhjet parlamentare të Rusisë

Prishtinë, 20 shtator 2026 09:03

Qindra dronë që synonin Moskën dhe rajonin përreth saj vranë të paktën dy persona dhe dëmtuan një rafineri të madhe nafte në ditën e fundit të zgjedhjeve parlamentare të vendit, thanë autoritetet të dielën.

Kryebashkiaku i Moskës tha se më shumë se 1,600 dronë ishin interceptuar dhe rrëzuar, 450 prej të cilëve kishin në shënjestër Moskën, ka raportuar TheGuardian.

Sergei Sobyanin akuzoi Ukrainën se po përpiqej të ndërhynte në zgjedhjet treditore, të kontrolluara rreptësisht, të cilat pritet të forcojnë më tej pushtetin e presidentit Vladimir Putin, i cili ka qenë në krye të vendit për 26 vjet.

Një vullnetar shpërndan fletushka për një kandidat të partisë Rusia e Bashkuar në Moskë.

“Sulmi i paprecedentë ishte qartësisht planifikuar me qëllimin për të penguar zgjedhjet. Armiku nuk ia doli”, shkroi ai në Telegram.

Guvernatori i rajonit të Moskës ka thënë se të paktën dy persona u vranë – një grua 44-vjeçare dhe një burrë i moshuar, në dy vende të ndryshme.

Një zjarr i shkaktuar nga përplasja e një droni me një ndërtesë 21-katëshe bëri gjithashtu që rreth 400 persona të evakuoheshin, tha guvernatori i rajonit të Moskës, Andrey Vorobyov, pa specifikuar origjinën e dronëve.

Sulmet ndodhën në një kohë kur Kievi ka shtuar fushatën e sulmeve me dronë me rreze të gjatë kundër Rusisë gjatë muajve të fundit, veçanërisht ndaj infrastrukturës energjetike, me synimin për të goditur një burim të rëndësishëm të të ardhurave të Kremlinit që përdoren për financimin e luftës – e cila tashmë ka hyrë në vitin e pestë.