Bastisje në Dubravë: 80 Zyrtarë dhe Njësia K9 në aksion kundër kontrabandës

Istog, 01 Gusht 2025

Në Qendrën Korrektuese në Dubravë është realizuar një bastisje në disa pavijone të institucionit, ku janë angazhuar 80 oficerë si dhe Njësia K9 e SHKK-së.

Në njoftim thuhet se qëllimi kryesor i bastisjes ishte luftimi i dukurive kontrabanduese, me fokus të veçantë në parandalimin e futjes dhe shpërndarjes së substancave narkotike brenda institucionit.

“Bastisje e Qëllimshme në Qendrën Korrektuese të Dubravës – Masa të Shtuara për Parandalimin e Kontrabandës. Sot, në Qendrën Korrektuese të Dubravës është realizuar bastisje e qëllimshme në disa pavijone të institucionit, me qëllim të identifikimit dhe parandalimit të veprimtarive të paligjshme. Në këtë aksion janë angazhuar 80 oficerë korrektues si dhe Njësia K9 e SHKK-së, të cilët kanë vepruar në mënyrë të koordinuar dhe profesionale gjatë kontrollit të hapësirave të përzgjedhura.

Qëllimi kryesor i bastisjes ishte luftimi i dukurive kontrabanduese, me fokus të veçantë në parandalimin e futjes dhe shpërndarjes së substancave narkotike brenda institucionit. Gjatë bastisjes nuk është hasur asnjë material i ndaluar apo substancë e jashtëligjshme, çka dëshmon një gjendje të kontrolluar dhe mbikëqyrje efektive brenda pavijoneve të kontrolluara”, thuhet në njoftim.