Inspektorati ndalon punimet në 12 vendpunishte në pesë komuna

Prishtinë, 21 gusht 2026 11:10

Inspektorati Qendror i Punës (IQP) ka urdhëruar ndalimin e menjëhershëm të punimeve në 12 vendpunishte në komunat e Skenderajt, Mitrovicës, Vushtrrisë, Prizrenit dhe Ferizajt, pas konstatimit të shkeljeve të rënda të rregullave të sigurisë dhe shëndetit në punë.

Sipas IQP-së, kontrollet janë realizuar në kuadër të inspektimeve të vazhdueshme për mbikëqyrjen e zbatimit të legjislacionit të punës dhe standardeve të sigurisë në vendin e punës.

Gjatë inspektimeve, zyrtarët kanë evidentuar parregullsi që, sipas tyre, paraqisnin rrezik serioz për jetën dhe shëndetin e punëtorëve.

Për këtë arsye, inspektorët kanë urdhëruar ndërprerjen e punimeve në të gjitha vendpunishtet ku janë konstatuar shkeljet, deri në eliminimin e tyre dhe krijimin e kushteve të sigurta për punë.

IQP ka bërë të ditur se punimet nuk do të mund të rifillojnë pa u përmbushur kërkesat ligjore dhe standardet e sigurisë. Rifillimi do të lejohet vetëm pasi inspektorët të verifikojnë në terren se parregullsitë janë eliminuar.

Inspektorati Qendror i Punës ka paralajmëruar se do të vazhdojë me kontrolle intensive në të gjithë territorin e Kosovës, duke theksuar se nuk do të tolerohen shkeljet që rrezikojnë jetën dhe shëndetin e punëtorëve.