Rrënime të objekteve pa leje edhe në zonën afër Liqenit të Radoniqit

Prishtinë, 19 gusht 2026 12:17

Ministrja e Mjedisit dhe Planifikimit Hapësinor, Fitore Pacolli, ka njoftuar se inpsektorët e ministrisë në fjalë kanë nisur aksionin për rrënimin e objekteve të ndërtuara pa leje në pronë publike.

“Rend dhe ligjshmëri në çdo pjesë të Kosovës”, ka shkruar Pacolli, duke paralajmëruar praninë e saj në terren.

Aksioni në Radoniq vjen pas ndërhyrjeve të Inspektoratit Mjedisor në zonën e Liqenit të Ujmanit, ku janë rrënuar një numër i konsiderueshëm i objekteve të ndërtuara në mënyrë të paligjshme në pronë publike.

Më 30 korrik, Pacolli kishte njoftuar se deri atëherë ishin rrënuar 17 ndërtesa dhe vila në zonën e Ujmanit, duke paralajmëruar se aksionet për lirimin dhe mbrojtjen e pronës publike do të shtriheshin edhe në zona të tjera të Kosovës.

Liqeni i Radoniqit, i cili ndodhet në territorin e Komunës së Gjakovës, është një nga burimet e rëndësishme ujore të Kosovës dhe ka rëndësi të veçantë për furnizimin me ujë dhe menaxhimin e resurseve ujore.

Detajet për numrin e objekteve që do të rrënohen dhe rezultatet e aksionit pritet të bëhen të ditura pas përfundimit të inspektimit në terren.