Për kontributin në Kosovë, Maqedonci nderon me medalje senatoren Joni Ernst

Prishtinë, 11 gusht 2026 21:32

Ministri i Mbrojtjes i Kosovës, Ejup Maqedonci, i ka ndarë senatores amerikane Joni Ernst medaljen për shërbim të shquar, në shenjë mirënjohjeje për kontributin e saj në forcimin e marrëdhënieve ndërmjet Kosovës dhe Shteteve të Bashkuara të Amerikës.

Ernst, e cilësuar nga Maqedonci si “mikja e dëshmuar e Kosovës”, është pritur në Ministrinë e Mbrojtjes së bashku me delegacionin e Gardës Kombëtare të Iowa-s, të kryesuar nga gjenerali Stephen Osborn.

Sipas Maqedoncit, ndarja e medaljes është bërë në vlerësim të mbështetjes së vazhdueshme të senatores amerikane ndaj Ministrisë së Mbrojtjes dhe Forcës së Sigurisë së Kosovës, si dhe për kontributin e saj ndër vite në forcimin e partneritetit Kosovë–SHBA.

Gjatë takimit, Maqedonci dhe delegacioni amerikan diskutuan për partneritetin ndërmjet Kosovës dhe SHBA-së, me fokus në thellimin e mëtejmë të bashkëpunimit në fushën e mbrojtjes dhe sigurisë.

Ministri i Mbrojtjes theksoi se partneriteti me Shtetet e Bashkuara dhe bashkëpunimi i veçantë me Gardën Kombëtare të Iowa-s kanë qenë dhe vazhdojnë të jenë ndër shtyllat kryesore të zhvillimit profesional dhe institucional të FSK-së dhe forcimit të kapaciteteve mbrojtëse të Kosovës.

“Republika jonë i çmon dhe i kujton gjithmonë miqtë që i qëndrojnë pranë dhe që, me angazhimin e tyre, kanë kontribuar në forcimin e shtetit dhe të sigurisë sonë”, ka deklaruar Maqedonci.

Ai ka vlerësuar se miqësia dhe partneriteti me Shtetet e Bashkuara të Amerikës mbeten të pazëvendësueshme për Kosovën.