FBI-ja dhe Shërbimi Korrektues i Kosovës forcojnë partneritetin për sigurinë

Prishtinë, 6 gusht 2026 20:38

Zyrtarë të lartë të Shërbimit Korrektues të Kosovës kanë zhvilluar një takim me përfaqësues të FBI-së, ku në fokus ishte thellimi i bashkëpunimit në fushën e sigurisë dhe forcimi i kapaciteteve institucionale.

Gjatë takimit u diskutua për bashkëpunimin në parandalimin dhe luftimin e terrorizmit, identifikimin dhe menaxhimin e rreziqeve të sigurisë, si dhe për ngritjen e kapaciteteve profesionale përmes shkëmbimit të përvojave dhe praktikave më të mira ndërkombëtare, shkruan Veritasinfo.

Palët vlerësuan bashkëpunimin e deritanishëm, duke theksuar se ai ka sjellë rezultate konkrete dhe ka ndikuar në avancimin e kapaciteteve profesionale të Shërbimit Korrektues të Kosovës në përballimin e sfidave të sigurisë.

Sipas njoftimit, u shpreh gatishmëri që partneriteti ndërmjet Shërbimit Korrektues të Kosovës dhe FBI-së të vazhdojë të forcohet përmes koordinimit të vazhdueshëm, shkëmbimit të informatave dhe realizimit të aktiviteteve të përbashkëta profesionale, me synim rritjen e sigurisë dhe zbatimin efektiv të ligjit.