Zero transparencë në gjashtë komuna të drejtuara nga Lista Serbe

Prishtinë, 6 gusht 2026 11:24

Komunat e udhëhequra nga Lista Serbe vazhdojnë të shfaqin nivelin më të ulët të transparencës buxhetore në Kosovë, sipas Indeksit të Transparencës Buxhetore të Institutit GAP.

Të dhënat tregojnë se gjashtë komuna me shumicë serbe, Zubin Potoku, Leposaviqi, Shtërpca, Parteshi, Kllokoti dhe Zveçani, janë renditur në fund të listës me 0 pikë, duke mos përmbushur kriteret e matjes së transparencës buxhetore.

Ndërkohë, edhe komunat e tjera që udhëhiqen nga Lista Serbe nuk kanë shënuar rezultate të kënaqshme. Ranillugu ka marrë vetëm 35 pikë, duke u renditur ndër komunat me performancën më të dobët, ndërsa Graçanica ka grumbulluar 48 pikë, rezultat që e vendos në gjysmën e poshtme të tabelës.

Në anën tjetër të renditjes, një numër i konsiderueshëm komunash kanë arritur rezultatin maksimal prej 100 pikësh, përfshirë Deçanin, Mitrovicën, Vushtrrinë, Shtimen, Prizrenin, Podujevën, Rahovecin, Obiliqin, Ferizajn dhe Kaçanikun.

Rezultatet pasqyrojnë një dallim të madh në nivelin e publikimit të dokumenteve buxhetore dhe informimit të qytetarëve mbi menaxhimin e financave publike, me komunat e drejtuara nga Lista Serbe që dominojnë fundin e renditjes.