Sonte përballje shqiptare në Ligën e Konferencës

Prishtinë, 9 korrik 2026 08:40

Malisheva zbret sonte në fushë për ndeshjen e parë të raundit të parë kualifikues të Ligës së Konferencës, ku do të përballet me skuadrën e Vllaznisë.

Takimi do të zhvillohet në stadiumin “Loro Boriçi” në Shkodër, me fillim nga ora 20:00, ndërsa të dy skuadrat synojnë ta nisin me fitore aventurën e tyre në garat evropiane.

Skuadra shkodrane e pret këtë sfidë pas përgatitjeve intensive të zhvilluara gjatë ditëve të fundit, me stafin teknik që ka punuar në aspektin taktik dhe fizik për të qenë sa më e gatshme për përballjen ndaj ekipit kosovar.

Në anën tjetër, Malisheva do të kërkojë të marrë një rezultat pozitiv në transfertë, për të krijuar avantazh para ndeshjes së kthimit, e cila do të zhvillohet pas një jave në Kosovë.

Përballja mes Vllaznisë dhe Malishevës pritet të jetë mjaft e luftuar, duke pasur parasysh rëndësinë e rezultatit në një format eliminues, ku çdo gol mund të jetë vendimtar për kualifikimin në raundin e dytë të Ligës së Konferencës.

Tifozët pritet të krijojnë një atmosferë të zjarrtë në “Loro Boriçi”, ndërsa vëmendja do të jetë e përqendruar te dueli mes dy skuadrave shqiptare që synojnë të vazhdojnë rrugëtimin në Evropë.