Ministria e Infrastrukturës paralajmëron investime të reja në veri, planifikohet zgjerimi i rrugës Mitrovicë–Jarinjë

Prishtinë, 8 korrik 2026 14:20

Ministria e Infrastrukturës dhe Transportit ka paralajmëruar se gjatë vitit të ardhshëm do të realizojë investime të reja infrastrukturore në veri të Kosovës, me fokus rehabilitimin dhe zgjerimin e rrugës nacionale Mitrovicë–Jarinjë (N22.3), si dhe shqyrtimin e mundësisë për ndërtimin e një ure të re në Leshak, përcjell VeritasInfo.

Këto plane u bënë të ditura gjatë vizitës së ministrit të Infrastrukturës dhe Transportit, Dimal Basha, në veri të vendit, ku ai inspektoi nga afër gjendjen e rrugës Mitrovicë–Jarinjë dhe Urën e Leshakut.

Sipas Ministrisë, aksi rrugor Mitrovicë–Jarinjë, i cili së fundmi i është nënshtruar punimeve të sanimit, ka rëndësi të veçantë për qarkullimin e qytetarëve dhe sigurinë në komunikacion. Për këtë arsye, gjatë vitit të ardhshëm planifikohet rehabilitimi dhe zgjerimi i segmentit në pjesët ku kushtet teknike e mundësojnë.

Gjatë vizitës u inspektua edhe Ura e Leshakut, e cila ka pësuar dëmtime të konsiderueshme nga vërshimet. Ministria njoftoi se, në bashkëpunim me projektuesit, do të shqyrtojë mundësinë e ndërtimit të një ure të re për të siguruar një lidhje më të qëndrueshme dhe më të sigurt për banorët e zonës.

Ministri Basha vizitoi gjithashtu pikën kufitare në Jarinjë, ku falënderoi zyrtarët kufitarë për profesionalizmin dhe angazhimin e tyre në shërbim të qytetarëve.

Sipas Ministrisë së Infrastrukturës dhe Transportit, investimet infrastrukturore do të vazhdojnë në të gjitha rajonet e Kosovës, me synim përmirësimin e infrastrukturës rrugore, rritjen e sigurisë dhe lehtësimin e lëvizjes së qytetarëve.