MPJD-ja për arrestimin e Selmanit në Serbi: Kemi kërkuar nga ndërkombëtarët të bëjnë presion për lirimin e tij

Prishtinë, 06 Korrik 2026 19:35
Ministria e Punëve të Jashtme dhe Diasporës (MPJD), ka bërë të ditur se Zyra Ndërlidhëse e Republikës së Kosovës në Serbi ka informuar menjëherë misionet diplomatike të vendeve të Quint-it të akredituara në Beograd, si dhe Delegacionin e Bashkimit Evropian në Serbi, për arrestimin e kosovarit Osman Selmani procedurat e iniciuara ndaj tij nga autoritetet serbe.
Në një përgjgije për KOHËN thuhet se dhe në komunikimet me partnerët ndërkombëtarë është kërkuar angazhim dhe ushtrim i ndikimit të tyre ndaj autoriteteve serbe për trajtimin e drejtë të rastit dhe lirimin e tij.
“Arrestimet e shtetasve të Kosovës në Serbi, nën pretendimet për kryerje të krimeve të luftës kundër popullsisë jo-shqiptare gjatë luftës në Kosovë në vitin 1999, janë të ngjashme me rastet e mëparshme që janë kundërshtuar fuqishëm, duke i vlerësuar si veprime arbitrare, pa bazë të qëndrueshme ligjore dhe me prapavijë politike”, thuhet në përgjigjen e Ministrisë.
Ministria e Punëve të Jashtme dhe Diasporës thuhet se mbetet në kontakt me institucionet vendore dhe partnerët ndërkombëtarë dhe u bën thirrje të vazhdueshme që të shtojnë presionin ndaj autoriteteve të Serbisë, e cila, siç theksohet, “vazhdon praktikën e keqtrajtimit dhe arrestimit të shtetasve të Republikës së Kosovës, duke cenuar kështu normat dhe standardet ndërkombëtare për të drejtat e njeriut”.
Po ashtu thuhet se pas konfirmimit të rastit, Zyra Ndërlidhëse i ka adresuar një kërkesë zyrtare Qeverisë së Serbisë, përmes Zyrës Ndërlidhëse të Serbisë në Kosovë, duke kërkuar informacion të plotë lidhur me arrestimin, arsyet e ndalimit, trajtimin nga autoritetet policore, vendndodhjen e mbajtjes dhe të gjitha të dhënat relevante për rastin.
Paralelisht thuhet se është paraqitur edhe kërkesa zyrtare për lejimin e vizitës së Ambasadorit Jetish Jashari tek z. Selmani në qendrën e paraburgimit.
Selmani u arrestua të mërkurën në pikë kufitare në Mutivodë, nën dyshimin për “Krime lufte”.