Prokuroria e Kosovës: Dy persona ndalohen për vrasjen e një personi në Ferizaj

Prishtinë, 29 qershor 2026 11:02

Dy persona janë ndaluar nga organet e drejtësisë në lidhje me vrasjen e një personi, ngjarje që ndodhi mbrëmjen e së dielës në Ferizaj.

Prokuroria Themelore në Ferizaj njoftoi se rreth orës 22:50 të datës 28 qershor, në një banesë në rrugën “Sejdi Sejdiu”, është pranuar informata se një person ishte gjetur pa shenja jete.

“Menjëherë në vendin e ngjarjes kanë dalë prokurori kujdestar i Departamentit për Krime të Rënda, hetuesit rajonalë dhe njësitë e tjera relevante, të cilët kanë zhvilluar veprimet e para hetimore për zbardhjen e plotë të rastit”, thuhet në njoftimin e Prokurorisë së Kosovës, përcjell VeritasInfo.

Me vendim të prokurorit të shtetit, është ndaluar për 48 orë një e dyshuar për veprën penale “Vrasja”. Po ashtu, është ndaluar edhe babai i saj, me inicialet M.B., derisa të sqarohen plotësisht rrethanat e rastit dhe përfshirja e tij e mundshme në këtë ngjarje.

Viktima, me inicialet F.H., është dërguar për obduksion në Institutin e Mjekësisë Ligjore në Prishtinë.

Prokuroria Themelore në Ferizaj ka bërë të ditur se hetimet janë në vazhdim dhe se po punohet për zbardhjen e të gjitha rrethanave, si dhe të motivit që çoi në këtë rast të rëndë penal.