Gjykata Speciale: Vizitat e të paraburgosurve në Kosovë të lejuara për arsye të justifikuara humanitare

Prishtinë, 23 qershor 2026 08:08

Zëdhënësja e Dhomave të Specializuara, Angela Grip, deklaroi se rregullat e gjykatës u lejojnë të paraburgosurve të paraqesin një kërkesë për të vizituar Kosovën në rastet kur ka arsye të justifikuara humanitare për ta bërë këtë.

“Gjyqtarët e miratuan këtë rregull bazuar në ligjin ndërkombëtar të të drejtave të njeriut, duke përfshirë Nenin 5 të Konventës Evropiane për të Drejtat e Njeriut dhe Rregullat Minimale Standarde të Kombeve të Bashkuara për Trajtimin e të Burgosurve”, tha Grip.

Sipas saj, 14 të pandehur nga Kosova deri më tani kanë ushtruar të drejtën për të vizituar Kosovën në rastet e sëmundjes ose vdekjes së një anëtari të familjes.

“Në rastin e Hashim Thaçit, për shembull, u bënë katër vizita të tilla”, shtoi Grip në një mesazh video në rrjetin social “X”.