Aktivitet çiklistik në nderim të policëve që dhanë jetën në krye të detyrës

Prishtinë, 26 korrik 2025

Në shënim të 14-vjetorit të rënies së Heroit të Kosovës, Enver Zymeri, dhe Ditës Memoriale të zyrtarëve policorë të rënë në krye të detyrës, është organizuar një aktivitet simbolik çiklizmi, me gjatësi 35 kilometra.

Sipas njoftimit të Ministrisë së Punëve të Brendshme, gjatë marshutës çiklistët janë ndalur për të bërë homazhe pranë Lapidarit në Varagë të Zubin Potokut, në vendin ku ra heroikisht Enver Zymeri.

Ky aktivitet u organizua në nderim të sakrificës sublime të 24 zyrtarëve policorë që dhanë jetën në krye të detyrës, duke kujtuar me respekt dhe përulësi kontributin e tyre të çmuar për ruajtjen e rendit dhe sigurisë publike.