“I vranë dhe i hodhën në pus” – dëshmia e familjes Lipaj nga Istogu në gjykimin ndaj Pantiq dhe Zariq

Prishtinë, 22 maj 2026 11:24

Masakra e 13 prillit 1999 në Studenicë të Istogut u rikthye në sallën e gjyqit përmes rrëfimeve tronditëse të dëshmitarëve Enver dhe Rahime Lipaj, të cilët treguan se si nëntë anëtarë të familjes së tyre, përfshirë gra, pleq dhe fëmijë, u vranë nga forcat serbe dhe më pas trupat e tyre u hodhën në një pus për t’u fshehur gjurmët e krimit.

Sipas dëshmisë së Enver Lipajt në Gjykatën Themelore në Prishtinë, familjarët e tij kishin shkuar në shtëpinë e vjehrrit për të përgatitur ushqim për pjesën tjetër të familjes që ishte strehuar në mal. Ai tha se më vonë ata ishin kapur nga forcat serbe, ishin ekzekutuar dhe trupat e tyre ishin hedhur në pus, i cili më pas ishte dëmtuar me mjete shpërthyese.

Lipaj deklaroi se ndër viktimat ishte edhe një vajzë 15-vjeçare, duke theksuar se të vrarët ishin civilë të pambrojtur. Edhe bashkëshortja e tij, Rahime Lipaj, rrëfeu para trupit gjykues momentet e fundit para ngjarjes, duke treguar se djali i tyre kishte shkuar për t’i njoftuar familjarët që të largoheshin nga shtëpia, por ato kishin qëndruar edhe për pak kohë.

Këto dëshmi u dhanë në vazhdimin e gjykimit ndaj të akuzuarve për krime lufte, Momir Pantiq dhe Zharko Zariq. Sipas dëshmitarit Enver Lipaj, Pantiq, i cili në atë kohë kishte qenë ish-kryeshef i policisë në Istog, ndodhej në pozitë komanduese dhe kishte mundësi të parandalonte krimet që po kryheshin ndaj civilëve shqiptarë.

Sipas aktakuzës së Prokurorisë Speciale të Kosovës, të akuzuarit ngarkohen për krime lufte kundër popullatës civile gjatë viteve 1998-1999 në rajonin e Istogut, përfshirë vrasje, dhunë dhe keqtrajtime ndaj civilëve shqiptarë.