Investim 9.15 milionë euro për bujqësinë, inaugurohet sistemi i ujitjes në Radoniq

Prishtinë, 21 maj 2026 08:29

Ka përfunduar me sukses projekti për rehabilitimin e sistemit të ujitjes në Radoniq të Gjakovës, një investim me vlerë prej 9.15 milionë eurosh që pritet të ndikojë ndjeshëm në zhvillimin e bujqësisë në rajonin e Gjakovës, Rahovecit dhe Prizrenit.

Ministri i Bujqësisë, Pylltarisë dhe Zhvillimit Rural, Armend Muja, theksoi rëndësinë e këtij projekti për rritjen e kapaciteteve të ujitjes dhe mbështetjen e fermerëve vendorë.

Projekti është financuar nga Komisioni Evropian përmes një donacioni, ndërsa administrimi është bërë nga Banka Botërore dhe zbatimi nga Ministria e Bujqësisë.

Sipas të dhënave zyrtare, sistemi ekzistues i ujitjes mbulonte rreth 5 mijë hektarë tokë bujqësore, ndërsa pas realizimit të projektit janë përfshirë edhe 6 mijë hektarë të tjerë. Me këtë zgjerim, sipërfaqja totale që përfiton nga furnizimi më i sigurt dhe më efikas me ujë arrin në rreth 11 mijë hektarë.

Autoritetet vlerësojnë se investimi do të ndikojë drejtpërdrejt në rritjen e prodhimit bujqësor, përmirësimin e kushteve për fermerët dhe zhvillimin ekonomik të rajonit perëndimor të Kosovës.