Zgjedhjet e parakohshme në prag, KQZ trajnon komisionet komunale zgjedhore

Prishtinë, 18 maj 2026 08:55

Komisioni Qendror i Zgjedhjeve ka intensifikuar përgatitjet për organizimin e zgjedhjeve të parakohshme për Kuvendin e Kosovës, të cilat do të mbahen më 7 qershor 2026.

Në kuadër të këtyre përgatitjeve, KQZ-ja ka zhvilluar një program trajnimi dyditor për mbi 200 anëtarë të 38 Komisioneve Komunale të Zgjedhjeve.

Sipas njoftimit të KQZ-së, trajnimi ka pasur për qëllim aftësimin e anëtarëve të KKZ-ve për përgjegjësitë dhe obligimet ligjore që lidhen me menaxhimin e procesit zgjedhor në nivel lokal.

Pjesëmarrësit janë njoftuar me dispozitat e Ligjit për Zgjedhjet e Përgjithshme, si dhe me procedurat që duhet të ndiqen gjatë organizimit të zgjedhjeve të parakohshme.

Programi ka përfshirë edhe aspekte praktike të procesit zgjedhor, përfshirë menaxhimin e operacioneve në komuna, procesin e votimit dhe numërimit në vendvotime, si dhe procedurat në Qendrat Komunale të Numërimit dhe në Qendrën e Numërimit dhe Rezultateve.

Në trajnim është trajtuar edhe përdorimi i platformave digjitale për futjen dhe menaxhimin e të dhënave zgjedhore, me synim rritjen e efikasitetit dhe saktësisë gjatë procesit.

KQZ ka theksuar se Komisionet Komunale të Zgjedhjeve kanë rol kyç në administrimin e procesit zgjedhor në komunat përkatëse, duke vepruar nën mbikëqyrjen e institucionit qendror zgjedhor për të garantuar ligjshmërinë dhe mbarëvajtjen e zgjedhjeve.

Ndryshe, më 8 maj, KQZ-ja ka emëruar mbi 200 anëtarë të këtyre komisioneve, mandati i të cilëve do të përfundojë 15 ditë pas certifikimit të rezultateve përfundimtare të zgjedhjeve.