Kosova pa president, vendi shkon në zgjedhje të jashtëzakonshme

Prishtinë, 29 prill 2026

Deputetët e Kuvendit të Kosovës kanë dështuar ta zgjedhin presidentin, duke bërë që vendi të shkojë në zgjedhje të jashtëzakonshme brenda afatit prej 45 ditësh, sipas vendimit të Gjykatës Kushtetuese.

Në seancat e mbajtura për zgjedhjen e presidentit kanë marrë pjesë vetëm deputetët e pushtetit, ndërsa opozita ka munguar, duke pamundësuar kuorumin e nevojshëm për votim.

E marta ishte afati i fundit për zgjedhjen e presidentit, bazuar në vendimin e Gjykatës Kushtetuese. Me dështimin e procesit, pritet që vendi të shkojë në zgjedhje të jashtëzakonshme jo më vonë se 45 ditë.

Këto do të jenë zgjedhjet e pesta që nga viti i kaluar, duke reflektuar një krizë të vazhdueshme institucionale në vend.

Seanca për zgjedhjen e presidentit kishte nisur të hënën, ku Lëvizja Vetëvendosje kishte propozuar Feride Rushitin dhe Hatixhe Hoxhën si kandidate, pas mungesës së një marrëveshjeje politike. Në raundin e parë të votimit, Feride Rushiti kishte marrë 63 vota, ndërsa një votë ishte shpallur e pavlefshme, duke mos arritur kuorumin prej 80 votash.

Pas dështimit të votimit, procesi ishte shoqëruar me reagime të shumta, ku disa palë e kishin cilësuar situatën si antikushtetuese.

Seanca ishte shtyrë disa herë gjatë ditës – fillimisht në orën 10:00, më pas në 14:00, 19:00 dhe përfundimisht në 23:00 – pa arritur rezultat.

Gjatë gjithë ditës, si pushteti ashtu edhe opozita kanë mbajtur konferenca për media, duke ia hedhur përgjegjësinë njëra-tjetrës për bllokadën institucionale.

Kryeministri Albin Kurti e ka cilësuar sjelljen e opozitës si joshtetërore dhe antiinstitucionale, duke e akuzuar për bllokim të proceseve kushtetuese