Vdes një 32-vjeçar në Ferizaj, dyshohet se plagosi të dashurën dhe qëlloi veten

Prishtinë 11 Prill 2026. 11:26

Policia e Kosovës ka njoftuar se një person ka vdekur dhe një tjetër është plagosur pas të shtënave me armë të premten në mbrëmje në Ferizaj.

Zëdhënësi i Policisë së Kosovës për rajonin e Ferizajt, Kanun Veseli ka konfirmuar për KALLXO.com se rasti fillimisht ishte cilësuar si tentim vrasje. I dyshuari V. K. (32-vjeçar), mashkull, kosovar sipas zëdhënësit të policisë ka vdekur mëngjesin e së shtunës, më 11.04.2026.

Sipas forcave të rendit, të premten rreth orës 22:00 një person fillimisht dyshohet se ka plagosur të dashurën e tij dhe më pas ka qëlluar veten. Ata fillimisht u dërguan për tretman mjekësor në Ferizaj e pastaj në Qendrën Klinike Universitare të Kosovës (QKUK).

“Më 10.04.2026, rreth orës 22:00, është raportuar rasti ku kanë mbetur të plagosur dy persona: L. U. (24-vjeçare), femër, kosovare, dhe V. K. (32-vjeçar), mashkull, kosovar. Viktima e rastit, L. U., pasi ka pranuar ndihmën e parë në Emergjencën e Ferizajt, është dërguar për trajtim të mëtejshëm mjekësor në Qendrën Klinike Universitare të Kosovës (QKUK) në Prishtinë, ku ndodhet ende nën përkujdesjen e mjekëve” – ka thënë Kanun Veseli.

“Ndërsa personi V. K., i cili në këtë rast ishte në cilësinë e të dyshuarit dhe po trajtohej në QKUK në Prishtinë, si pasojë e lëndimeve të marra, më 11.04.2026, rreth orës 04:05, sipas informatës së pranuar nga QKUK në Prishtinë, ka ndërruar jetë” – thuhet tutje në deklarimin e Veselit