Milanoviq anulon takimin e Brdo-Brionit: Vuçiç nuk mund të vije në Kroaci

Prishtinë, 30.03.2026 18:24

Presidenti i Kroacisë, Zoran Milanoviq, deklaroi se mbërritja e presidentit të Serbisë, Aleksandar Vuçiç, në Kroaci nuk është e mundur në këtë kohë, për shkak të deklaratave dhe veprimeve të tij të fundit. Për këtë arsye, ai vendosi të anulojë takimin e Procesit Brdo-Brioni.

“Deklaratat dhe veprimet politike të presidentit të Serbisë, Aleksandar Vuçiç, të cilat i kemi parë në ditët dhe javët e fundit, janë në kundërshtim të plotë me qëllimin e Procesit Brdo-Brioni, dëmtojnë marrëdhëniet ndërshtetërore dhe kërcënojnë paqen dhe stabilitetin në Evropën Juglindore”, thuhet në deklaratën me shkrim të Milanoviqit.

Sipas tij, në rrethana të tilla nuk ekzistojnë kushtet e nevojshme për mbajtjen e takimit, ndërsa ardhja e Vuçiçit në Kroaci – e cila pritej të ishte nikoqire e Procesit Brdo-Brioni në maj të këtij viti – nuk është e mundur, bëri të ditur kabineti i presidentit kroat.

Në njoftimin për shtyp rikujtohet se Kroacia dhe Sllovenia, si vende anëtare të Bashkimit Evropian, e kanë iniciuar Procesin Brdo-Brioni me qëllim forcimin e bashkëpunimit rajonal dhe përshpejtimin e integrimit evropian të vendeve të Evropës Juglindore.

Si bashkëkryetar i këtij procesi, Milanoviq vendosi të anulojë takimin e planifikuar në Kroaci dhe ka informuar krerët e shteteve pjesëmarrëse për këtë vendim.

Takimi i ardhshëm i krerëve të shteteve të Procesit Brdo-Brioni do të mbahet pasi të krijohen kushtet e nevojshme, pas konsultimeve ndërmjet Milanoviqit dhe presidentes së Sllovenisë, Natasha Pirc Musar, e cila është gjithashtu bashkëkryetare e këtij procesi.

Në muajt e fundit, Vuçiç ka akuzuar shpesh Kroacinë, pa paraqitur prova, për “ndërhyrje brutale” në punët e brendshme të Serbisë, duke pretenduar se kundërshtarët e tij politikë në vend përbëjnë “mbështetjen kryesore logjistike për përmbysjen e Serbisë”.