Kurti: Do t’u dërgoj ftesa liderëve opozitarë për takim

Prishtinë 30Mars 2026 11:27

Kryeministri, Albin Kurti ka thënë se do t’u dërgojë ftesa liderëve të partive opozitare për takime sa përket çështjes së presidentit. Kurti insiston se për të qenë të sigurt për zgjedhjen e presidentin duket të jenë së paku 85 apo 86 vota në Kuvend.

Kreu i qeverisë tha se mbrëmë u kthye nga Parisi, pas takimit që pati me presidentin francez, Emmanuel Macron, prandaj nuk e pati kohën e mjaftueshme që t’i bënte konsultimet e brendshme për takimet e ardhshme.

“Padyshim që do të bëjë ftesa për takime për kryetarët e partive opozitare në mënyrë që të shohim se cilat janë rrugët, ashtu që të marrim numrin prej së paku 80 deputetëve. E unë po e ritheksoj se nuk është mirë që të jemi 80 ose 81, duhet të jemi rreth 85 deri ne 86, në mënyrë që të jemi të sigurt në që ta zgjedhim presidentin aty. Dhe për këtë do të bëjë edhe ftesa e do të zhvillojmë edhe takime, por çfarë ofertash e kërkesash do të ketë në ato takim,e duhet të presim që të ndodhin ato takime”, tha Kurti në konferencë për media pas mbledhjes së Qeverisë.