​ATK-ja nis zbatimin e marrëveshjes Kosovë-Itali për eliminimin e tatimit të dyfishtë

Prishtinë 19 Mars 2026 11:23

Administrata Tatimore e Kosovës (ATK) ka njoftuar se ka filluar zbatimi i marrëveshjes ndërmjet Republikës së Kosovës dhe Republikës së Italisë për eliminimin e tatimit të dyfishtë dhe parandalimin e evazionit dhe shmangies tatimore në fushën e tatimit në të ardhura.

Sipas ATK-së, kjo marrëveshje synon të avancojë marrëdhëniet ekonomike ndërmjet dy vendeve dhe të forcojë bashkëpunimin në çështjet tatimore.

Përmes saj mundësohet eliminimi i barrës së tatimit të dyfishtë për individët dhe bizneset, duke kontribuar në krijimin e një mjedisi më të favorshëm për investime dhe zhvillim të aktiviteteve ekonomike.

“Në të njëjtën kohë, marrëveshja adreson edhe parandalimin e evazionit dhe shmangies tatimore, duke kufizuar përdorimin e skemave që çojnë në mosdeklarim apo deklarim jo të saktë të të ardhurave”, thuhet në njoftim e agjencisë.

ATK-ja bën të ditur se në kuadër të kësaj marrëveshjeje përcaktohen qartë personat e mbuluar dhe mënyra e trajtimit të të ardhurave për qëllime tatimore.

“Marrëveshja zbatohet për personat rezidentë të njërit apo të të dy shteteve kontraktuese dhe trajton të ardhurat që burojnë përmes subjekteve apo aranzhimeve të ndryshme, në përputhje me legjislacionin përkatës të secilit shtet”, thuhet në njoftim.

Gjithashtu, sipas ATK-së, marrëveshja siguron respektimin e të drejtave tatimore të shteteve kontraktuese, duke përcaktuar rastet kur përfitimet nga kjo marrëveshje mund të aplikohen.

ATK-ja thotë se zbatimi i kësaj marrëveshjeje përbën një hap të rëndësishëm drejt forcimit të bashkëpunimit ekonomik ndërmjet Kosovës dhe Italisë, si dhe rritjes së sigurisë ligjore për investitorët dhe bizneset që operojnë në të dy vendet.

Aktualisht, Republika e Kosovës ka në fuqi gjithsej 22 marrëveshje për eliminimin e tatimit të dyfishtë me shtete të ndryshme.