Politikanët serbë selektojnë viktimat e trazirave të marsit të vitit 2004

Mitrovicë, 17 mars 2026 12:43

Në përvjetorin e 22-të të trazirave të marsit 2004, në Mitrovicën e Veriut përfaqësues të strukturave politike serbe organizuan homazhe për viktimat serbe të asaj periudhe, duke vendosur kurora lulesh pranë monumenteve përkujtimore në qytet.

Megjithatë, në këto përkujtime nuk u përmend një nga tragjeditë më të rënda që ndodhi pikërisht në të njëjtën ditë, mbytja e tre fëmijëve shqiptarë në lumin Ibër.

Më 17 mars 2004, Egzon Deliu (13 vjeç), Avni Veseli (12 vjeç) dhe Florent Veseli (9 vjeç) nga fshati Çabër humbën jetën pasi u hodhën në ujërat e Ibrit duke ikur nga ndjekja e një grupi serbësh.

Sipas dëshmive të kohës, fëmijët u detyruan të futeshin në lumë në përpjekje për të shpëtuar, por tre prej tyre nuk arritën të mbijetonin.

Tragjedia e fëmijëve të Çabrës është një nga ngjarjet më të dhimbshme të asaj dite dhe mbetet thellë e gdhendur në kujtesën e familjeve dhe të opinionit publik shqiptar në Kosovë.

Pavarësisht se përfaqësuesit e Listës Serbe dhe udhëheqja e komunës së Mitrovicës së Veriut organizuan homazhe për viktimat serbe të marsit 2004, në deklaratat dhe aktivitetet e tyre nuk pati asnjë përmendje për tre fëmijët shqiptarë që humbën jetën në lumin Ibër.

Kjo qasje selektive ndaj kujtesës së viktimave vazhdon të theksojë ndarjet në interpretimin e ngjarjeve të marsit 2004.

Kujtesa që nuk duhet të harrohet

Për familjet e Egzon Deliut, Avni dhe Florent Veselit, kjo datë mbetet një plagë e hapur. Çdo vit përkujtimi i tyre rikujton se viktimat e pafajshme të konfliktit, veçanërisht fëmijët nuk duhet të mbeten në harresë dhe as të anashkalohen nga përkujtimet publike.

Tragjedia në lumin Ibër mbetet një kujtesë e dhimbshme se edhe fëmijët u bënë viktima të urrejtjes dhe tensioneve etnike të serbëve ndaj shqiptarëve, dhe se drejtësia dhe e vërteta për këto ngjarje ende kërkojnë vëmendje dhe përgjegjësi institucionale.