Gjashtë projektligjet e Ministrisë së Mjedisit, Planifikimit Hapësinor dhe Infrastrukturës për këtë mandat

Prishtinë, 25 shkurt 2026 20:35

Ministria e Mjedisit, Planifikimit Hapësinor dhe Infrastrukturës ka vendosur në qendër të agjendës së saj legjislative hartimin dhe zbatimin e gjashtë projektligjeve kyçe, të cilat synojnë përmirësimin e cilësisë së jetës së qytetarëve dhe forcimin e mbrojtjes së mjedisit në vend.

Ministrja Fitore Pacolli bëri të ditur se këto iniciativa përbëjnë prioritetin kryesor të mandatit aktual, duke theksuar rëndësinë e reformave të thella në fushën e mjedisit dhe planifikimit hapësinor.

Sipas saj, projektligjet e parapara përfshijnë: Projektligjin për Mbrojtjen e Mjedisit; Projektligjin për Mbrojtjen e Natyrës; Projektligjin për Mbeturina; Projektligjin për Planifikim Hapësinor; Projektligjin për Banim Social dhe të Përballueshëm; Projektligjin për Inspektoratin e Mjedisit, Ujërave, Planifikimit Hapësinor dhe Ndërtimit.

Këto projektligje pritet të krijojnë një bazë më të fortë ligjore për menaxhimin e qëndrueshëm të burimeve natyrore, rregullimin e zhvillimit urban dhe fuqizimin e mekanizmave të inspektimit dhe zbatimit të ligjit.

Ministrja Pacolli theksoi se përmes këtyre reformave synohet jo vetëm harmonizimi me standardet bashkëkohore evropiane, por edhe garantimi i një mjedisi më të pastër dhe më të sigurt për qytetarët.

Procesi i hartimit dhe miratimit të projektligjeve pritet të zhvillohet gjatë këtij mandati, me angazhim të plotë institucional dhe në bashkëpunim me akterët relevantë.