SHBA-ja konfirmon angazhimin në NATO, Rubio: Aleanca mbetet prioritet kryesor

Prishtinë 16 shtator 2026 14:03

Sekretari amerikan i Shtetit, Marco Rubio, ka deklaruar se Shtetet e Bashkuara nuk kanë asnjë plan për t’u larguar nga NATO, duke hedhur poshtë spekulimet për një tërheqje të mundshme të Uashingtonit nga aleanca ushtarake perëndimore.

Sipas agjencisë ukrainase Ukrinform, Rubio i bëri këto komente gjatë një konference për shtyp së bashku me kryeministrin sllovak, Robert Fico, pas takimeve të zhvilluara në kuadër të diskutimeve ndërkombëtare për sigurinë.

“Sa i përket NATO-s, nuk e kuptoj – Shtetet e Bashkuara kanë mijëra e mijëra trupa të vendosura në misionin e NATO-s. Dhe ne e kemi bërë shumë të qartë, mendoj se u bë shumë e qartë në samitin vetëm pak ditë më parë ose në takimin në nivel ministrash të mbrojtjes. Ne nuk po largohemi nga NATO. Ne nuk po largohemi”, ka deklaruar Rubio.

Ai theksoi se prania ushtarake amerikane në kuadër të aleancës mbetet e fortë dhe e pandryshuar, duke nënvizuar se ripozicionimi i trupave nga një shtet në tjetrin është një praktikë e zakonshme dhe ka ndodhur vazhdimisht ndër vite, në varësi të nevojave strategjike dhe operacionale.

Rubio shtoi se nuk ka detyrë më të rëndësishme për asnjë shtet sesa aftësia për të mbrojtur popullin dhe territorin e tij, duke e lidhur këtë drejtpërdrejt me nevojën për forcimin e kapaciteteve mbrojtëse të vendeve anëtare të aleancës.

Ai theksoi se kjo është arsyeja pse SHBA-ja ka insistuar në rritjen e kontributeve dhe aftësive ushtarake të partnerëve të NATO-s, duke kërkuar që secili shtet të mbajë përgjegjësinë e vet në garantimin e sigurisë kolektive.

“Saq më të fortë të jenë aleatët tanë, aq më të fortë jemi të gjithë së bashku”, ka shtuar ai, duke nënvizuar rëndësinë e unitetit dhe koordinimit në një kohë sfidash të shtuara gjeopolitike.

Ndërkohë, mediat ukrainase raportojnë se presidenti i Ukrainës, Volodymyr Zelensky, dhe Rubio kanë zhvilluar më herët bisedime për forcimin e mbrojtjes ajrore të Ukrainës, si dhe për hapat e ardhshëm në negociatat që po zhvillohen në një format trepalësh.

Takimi mes tyre është zhvilluar në kuadër të diskutimeve në Mynih, ku çështjet e sigurisë evropiane, mbështetja për Ukrainën dhe roli i NATO-s në përballjen me kërcënimet aktuale kanë qenë në qendër të agjendës.