Maqedonci: FSK nuk përbën kërcënim, Kosova ndërton ushtri për mbrojtje dhe siguri për të gjithë

Prishtinë, 15 shkurt 2026 11:43

Ministri i Mbrojtjes i Republikës së Kosovës, Ejup Maqedonci, ka reaguar ndaj deklaratave të fundit të shefit të Shtabit të Përgjithshëm të Ushtrisë së Serbisë, Milan Mojsiloviq, duke i cilësuar ato si të pavërteta, të papërgjegjshme dhe në kundërshtim me realitetin në terren.
Sipas Maqedoncit, përpjekjet për ta paraqitur Forca e Sigurisë së Kosovës si kërcënim për komunitetin serb në Kosovë nuk kanë bazë faktike dhe synojnë krijimin e narrativave frikësuese. Ai theksoi se FSK-ja është një forcë profesionale, e ndërtuar mbi standarde të larta demokratike dhe që vepron nën kontroll të plotë civil, në përputhje me Kushtetutën dhe ligjet e Republikës së Kosovës, si dhe me obligimet ndërkombëtare të vendit.
“Mandati i Forcës së Sigurisë së Kosovës është dhe mbetet mbrojtja e sovranitetit dhe integritetit territorial të Republikës së Kosovës, si dhe garantimi i sigurisë për të gjithë qytetarët, pa asnjë dallim,” ka deklaruar Maqedonci.
Ministri ka nënvizuar se procesi i fuqizimit dhe modernizimit të Ushtrisë së Kosovës nuk ka karakter kërcënues ndaj askujt, por përfaqëson një të drejtë legjitime të çdo shteti sovran dhe një domosdoshmëri për ruajtjen e paqes, stabilitetit dhe sigurisë afatgjatë, si në vend ashtu edhe në rajon.
Ai ka paralajmëruar se deklaratat që nxisin tensione apo synojnë justifikimin e politikave destabilizuese nuk kontribuojnë në paqe dhe stabilitet, duke shtuar se përgjegjësia për sigurinë kërkon maturi, respekt për realitetin dhe përkushtim ndaj paqes.
Në fund, Maqedonci ka ritheksuar përkushtimin e Republikës së Kosovës për bashkëpunim të ngushtë me partnerët ndërkombëtarë dhe për ndërtimin e një mjedisi të sigurt për të gjithë qytetarët.
“Kosova ndërton ushtri për mbrojtje. Kosova ndërton siguri për të gjithë,” ka përfunduar ministri i Mbrojtjes.