Komuna e Vushtrrisë ndanë bursa për studentët që studiojnë në Universitetin e York-ut në Selanik

Vushtrri, 11 shkurt 2026 07:23

Komuna e Vushtrrisë, në bashkëpunim me Kampusin Evropian të Universitetit të York-ut në Selanik, ka shpallur ndarjen e 14 bursave të studimit për studentët nga kjo komunë për vitin akademik 2026/2027.

Sipas njoftimit të kryetarit të Komunës së Vushtrrisë, Ferit Idrizi, shtatë nga këto bursa do të mbulohen në tërësi, ku 100 për qind e shpenzimeve do të financohen nga Komuna e Vushtrrisë dhe Universiteti. Ndërkaq, shtatë bursa të tjera do të mbulohen pjesërisht, ku 50 për qind do të financohen nga Universiteti, ndërsa 50 për qind nga vetë studentët përfitues.

Bursat janë të dedikuara për studime të nivelit Bachelor, Master dhe MBA, në disa fusha akademike, përfshirë Shkencat Kompjuterike, me programe në Inteligjencë Artificiale dhe Shkencë të të Dhënave, Teknologji të Web-it dhe Informatikë Biznesi, si dhe në Psikologji, Biznes, Shkenca Humane dhe Drejtësi.

Afati i fundit për aplikim është 20 shkurti 2026, ndërsa të gjithë studentët e interesuar nga Komuna e Vushtrrisë inkurajohen të shfrytëzojnë këtë mundësi për avancimin e tyre akademik në një institucion ndërkombëtar të arsimit të lartë.

Kryetari i komunës, Ferit Idrizi ka theksuar se mbështetja për arsimin dhe të rinjtë mbetet një nga prioritetet kryesore të Komunës së Vushtrrisë, duke vlerësuar se investimi në dije është investim në të ardhmen e qytetit.