Komuna e Gjilanit investon 1 milion euro për Stacionin e ri të Autobusëve

Gjilan, 11 shkurt 2026 10:53

Punimet për ndërtimin e Stacionit të ri të Autobusëve në Gjilan po shkojnë drejt përfundimit, duke shënuar një investim të rëndësishëm prej rreth 1 milion eurosh në infrastrukturën e qytetit.
Ky projekt po realizohet falë bashkëpunimit me Qeverinë e Kosovës dhe është pjesë e angazhimit të vazhdueshëm për përmbushjen e premtimeve dhe përmirësimin e kushteve për qytetarët.
Kryetari i Komunës së Gjilanit, Alban Hyseni, ka theksuar se ky investim do të ketë ndikim të drejtpërdrejtë në zhvillimin e qytetit. “Po shkojmë drejt përfundimit të ndërtimit të Stacionit të ri të Autobusëve, një investim prej 1 milion eurosh që po e transformon këtë hapësirë në një objekt funksional dhe me infrastrukturë bashkëkohore për qytetarët dhe transportuesit vendorë e të huaj”, ka deklaruar Hyseni.
Ai shtoi se stacioni i ri do të ofrojë kushte moderne operimi, hapësira të reja për udhëtarët dhe shërbime cilësore, duke e bërë Gjilanin një qendër më të zhvilluar për transportin rajonal dhe ndërkombëtar.