AME: Prizreni është zonë sizmogjene aktive

Prishtinë, 11 shkurt 2026 06:58

Një tërmet me magnitudë 4.8 sipas shkallës Rihter ka goditur territorin e Kosovës mbrëmjen e së hënës, më 10 shkurt 2026, në ora 22:05.

Sipas të dhënave të Rrjetit Sizmologjik, Shërbimit Gjeologjik të Kosovës dhe Qendrës Sizmike Euro-Mesdhetare, lëkundjet janë ndier më së shumti në zonën juglindore të vendit, përkatësisht në rajonin Prizren–Shtërpcë.

Agjencia për Menaxhimin e Emergjencave ka njoftuar se tërmeti ka pasur intensitet VI ballë të shkallës së Merkalit, me thellësi hipoqendrore rreth 5 kilometra, ndërsa epiqendra është lokalizuar rreth 23 kilometra në lindje të Prizrenit, me koordinata gjeografike 42.144; 20.985.

Lëkundjet janë ndier në disa pjesë të Kosovës dhe, për shkak të forcës së tyre, kanë pasur potencial për të shkaktuar dëme materiale të lehta dhe për të rrezikuar qytetarët. Institucionet sqarojnë se kjo ngjarje konfirmon edhe një herë se zona e Prizrenit konsiderohet zonë sizmogjene aktive, siç paraqitet edhe në Hartën e Rrezikut Sizmik për Kosovën.

“Deri më tani, nuk ka raportime zyrtare për dëme serioze materiale apo persona të lënduar. Autoritetet kompetente bëjnë të ditur se janë në gatishmëri të plotë dhe po e monitorojnë situatën në vazhdimësi”, thuhet në njoftimin e kësaj agjencie.

Ndërkohë, qytetarët janë ftuar të ruajnë qetësinë, të informohen vetëm nga burime zyrtare dhe të ndjekin udhëzimet e sigurisë në rast të lëkundjeve të tjera.

“Numrat emergjentë 112, 193 dhe 192 mbeten në dispozicion të qytetarëve 24 orë në ditë”, thuhet në njoftimin e AME-s.