Mijëra familje në ankth e pa lajm për familjarët e tyre të pagjetur: Serbia po na persekuton emocionalisht

Prishtinë, 10 janar 2026 11:34

Nga Komisioni Qeveritar për Persona të Zhdukur thonë se përkundër angazhimit të tyre çështja e personave të zhdukur vazhdon të mbetet plagë e hapur për shumë familje kosovare.

Kushtrim Gara nga ky Komision thekson se gjatë vitit të kaluar janë zhvilluar gërmime në 32 lokacione dhe janë gjetur 24 mbetje mortore.

Sipas tij, sfiduese mbete mungesa e informacioneve dhe qasja politizuese e shtetit serb karshi të të pagjeturve.

“Janë diku më shumë se 30 lokacione të adresuara në kuptim të gërmimit vlerësues brenda territorit të Republikës së Kosovës. Sigurisht që jo të gjitha kanë rezultuar me gjetje dhe zhvarrosje të mbetjeve mortore për shkak se kemi thënë gjithmonë se sfidë në këtë proces vazhdon të mbetet mungesa e informacioneve të besueshme, më saktësisht mungesa e informacioneve që do të duhej të vinin nga arkivat institucionale të Serbisë. Pra rrjedhimisht sfida vazhdon të mbetet qasja politizuese e Serbisë kundrejt kësaj problematike”, thotë ai.

Se çështja e personave të pagjetur nuk pas ndonjë zhvillim pozitiv e thotë edhe drejtori i Fondit për të Drejtën Humanitare, Bekim Blakaj.

Sipas tij problemi kryesor në prolongimin e çështjes së të zhdukurve është mos zbatimi i Deklaratës së Përbashkët si ngecja në dialogun Kosovë-Serbi.

Edhe kryetari i Këshillit Koordinues për të Zhdukurit, Ahmet Grajqevci, e sheh vitin 2025, ashtu si çdo vit tjetër, pa përparim të dukshëm për zbardhjen e fatit të të pagjeturve.

“Edhe ky vit nuk dallon prej viteve të tjera paraprake, sepse në këtë vit ka pas pak më shumë hulumtime 28 vende janë hulumtuar në brendësi të Kosovës, ndërsa 1 në Kozhle të Serbisë edhe është hulumtuar në shtator si lojërat serbe që di t’i bëjë ajo e kanë ndërprerë në nëntor dhe kështu politikisht shtyhet këto procese jashtë Kosovës. Sa i përket brenda Kosovës janë hulumtuar ka gjetje mortore por presim analizën a ADN-së që do të dal…Familjarët asnjëherë nuk mund të jenë të kënaqur derisa nuk e gjejnë familjarin e vetë. është bërë pak punë, por jo sa duhet”, thekson Grajqevci.

Sipas Komisionit Ndërkombëtar për Personat e Zhdukur (ICMP), 1,591 persona nga lufta në Kosovë ende figurojnë si të zhdukur, nga gjithsej 6,063 të raportuar fillimisht.