Osmani e Kurti: Kosova mbështet operacionin anti-narkotik të SHBA-së në Venezuelë

Prishtinë, 03 janar 2026 14:34

Presidentja e Kosovës, Vjosa Osmani, ka deklaruar se Kosova qëndron përkrah Shteteve të Bashkuara të Amerikës dhe Presidentit Donald Trump në mbështetje të veprimeve kundër, siç e ka quajtur ajo, regjimit narko-terrorist të Venezuelës.

Osmani theksoi se Presidenti Trump ka qëndruar me popullin e Venezuelës duke iu kundërvënë narko-shtetit të udhëhequr nga Nicolas Maduro, në mbrojtje të Amerikës dhe sigurisë globale nga kartelet dhe krimi i organizuar. Sipas saj, ky është shembull i qartë i forcës dhe lidershipit amerikan.

Ajo shtoi se populli venezuelian meriton liri, demokraci dhe një të ardhme të bazuar në sundimin e ligjit, e jo në frikë dhe autoritarizëm.

Osmani nënvizoi se narko-terrorizmi dhe sundimi autoritar paraqesin kërcënim për paqen edhe përtej kufijve kombëtarë.

Duke kujtuar përvojën e Kosovës, Osmani tha se vendi e kupton mirë ndikimin e vendosmërisë amerikane, duke theksuar se çlirimi i Kosovës është dëshmi e drejtpërdrejtë e kësaj mbështetjeje.

Në anën tjetër, mbështetje ka dhënë edhe Kryeministri  i Kosovës, Albin Kurti, ka deklaruar se Kosova mbështet operacionin anti-narkotik të Shteteve të Bashkuara të Amerikës në Venezuelë, i udhëhequr nga Presidenti amerikan Donald Trump.

Në një postim në Facebook, Kurti theksoi se mbajtja përgjegjëse e aktorëve shtetërorë të përfshirë në trafikimin e drogave është thelbësore për suksesin e luftës kundër kësaj dukurie globale.

Ai nënvizoi se Kosova, si aleate strategjike e SHBA-së dhe NATO-s, ofron mbështetje të plotë në luftën kundër trafikimit të narkotikëve dhe kundër, siç u shpreh, cenimit të vlerave demokratike perëndimore nga aktorë përfaqësues të kundërshtarëve të këtyre vlerave.