Rama: Shqipëria do të prodhojë mjete të blinduara e dronë luftarakë

Prishtinë 30 Dhjetor 2025 17:36

Kryeministri i Shqipërisë, Edi Rama, ka thënë se Shqipëria do të nisë prodhimin e mjeteve të blinduara dhe dronëve luftarakë. Në konferencën e fundvitit, Rama ka thënë se Shqipëria synon të arrijë mesataren e shteteve të NATO-s sa i përket mbështetjes financiare.

Rama ka thënë sivjet Shqipëria është pajisur me sistem raketor Javelin, me tri anije patrulluese nga Italia dhe radarët e vëzhgimit ajror si bashkëpunim nga Franca.

“Ajo që mbetet ambicia kryesore, Shqipëria si vend prodhues kapacitetesh ushtarake që jo vetëm t’i përdorë këto kapacitete për nevojat e veta, por edhe të eksportojë kapacitete industriale ushtarake dhe prandaj ky vit është vit historik për ushtrinë tonë sepse janë hedhur themelet e industrisë së mbrojtjes ‘Made in Albania'”, ka thënë Rama.

Ai ka thënë se Shqipëria ka krijuar kompani shtetërore që ka nënshkruar partneritete me kompani vendase e të huaj për prodhim të municioneve. Te këto kontrata, sipas tij, hyjnë prodhimet e autoambulancave e mjete patrullimi policor.

“Do të prodhojmë dronët luftarakë dhe do të prodhojmë dhe sistemet anti-dronë dhe porositë e para janë kryer, ndërkohë që 6-mujorin e parë të 2026-tës do të shihni me siguri dhe produktet e para, ndërkohë që ne e vazhdojmë punën për të realizuar kontrata të tjera për industrinë detare dhe industrinë ajrore”, ka thënë Rama.

Rama ka deklaruar se Shqipëria sot është një nga vendet me kapacitetin më të lartë të mbrojtjes kibernetike.