Reshjet e borës, Ministria u bën thirrje shoferëve për kujdes të shtuar

Prishtinë, 27 dhjetor 2025 07:59

Pas reshjeve të fundit të borës në vend, Ministria e Mjedisit, Planifikimit Hapësinor dhe Infrastrukturës ka bërë të ditur se operatorët për mirëmbajtjen e rrugëve janë aktivizuar dhe ndodhen në gatishmëri të plotë për pastrimin dhe kriposjen e akseve rrugore në të gjithë territorin e Kosovës.

Sipas njoftimit të publikuar nga Ministria në rrjetin social Facebook, institucionet përgjegjëse janë të përgatitura që gjatë gjithë sezonit dimëror të sigurojnë qarkullueshmërinë e rrugëve dhe funksionimin normal të trafikut, pavarësisht kushteve atmosferike.

Autoritetet kanë apeluar gjithashtu tek qytetarët që të tregojnë kujdes të shtuar gjatë vozitjes, duke respektuar rregullat e trafikut dhe duke përshtatur shpejtësinë me kushtet e rrugës.

Ministria ka theksuar se bashkëpunimi i drejtuesve të automjeteve është i domosdoshëm për të shmangur aksidentet dhe për të garantuar sigurinë në komunikacion gjatë ditëve me mot të pafavorshëm.