Patentohet ventilatori mekanik – shpikja e vitit 2024 nga profesori i Universitetit të Prishtinës

Prishtinë, 10 dhjetor 2025 09:18

Inovacioni vendor shënon një tjetër arritje të rëndësishme. Profesori i Fakultetit të Inxhinierisë Mekanike në Universitetin e Prishtinës, prof. Arbnor Pajaziti, ka siguruar patentimin dhe njohjen zyrtare të shpikjes së tij të veçantë: “Ventilatori Mekanik me Lidhje Rivepruese të Rregullimit”, i certifikuar nga Agjencia për Pronësi Industriale e Republikës së Kosovës.

Kjo patentë, e cila u aplikua në shkurt të vitit 2024 dhe është e vlefshme deri më 2 shkurt 2044, përfaqëson një hap të rëndësishëm në zhvillimin e pajisjeve të avancuara të ventilimit mekanik. Ventilatori mekanik i patentuar është konceptuar si një pajisje inovative që mund të përdoret në një sërë fushash ku kërkohet kontroll i saktë dhe inteligjent i procesit të ventilimit.

Në këtë arritje shkencore ka kontribuar edhe Petrit Abdyli, inxhinier dhe i diplomuar në nivel master në Fakultetin e Inxhinierisë Mekanike, i cili ka qenë bashkëpunëtor i afërt i profesor Pajaziti gjatë zhvillimit të projektit.

Shpikja e tyre ndërthur me mjeshtëri mekatronikën, mjekësinë dhe industrinë, duke dëshmuar se Universiteti i Prishtinës po vazhdon të qëndrojë në hap me inovacionet bashkëkohore dhe zhvillimet teknologjike globale.

Ideja për ndërtimin e këtij ventilatori lindi në një kohë sfiduese – gjatë pandemisë së Covid-19, kur u bë e qartë se mungesa e pajisjeve të tilla ishte një nga problemet më të mëdha me të cilat përballeshin sistemet shëndetësore në mbarë botën. Projekti u mbështet financiarisht nga Bashkimi Evropian dhe Rektorati i Universitetit të Prishtinës, duke treguar besimin dhe rëndësinë që iu dha këtij inovacioni.

Patenta e re e përforcon pozitën e Universitetit të Prishtinës si një qendër e rëndësishme e shkencës dhe inovacionit në rajon, ndërsa profesor Pajaziti dhe ekipi i tij mbeten shembull frymëzimi për gjeneratat e reja të inxhinierëve dhe studiuesve kosovarë.