Kurti: U shkatërruan 146 grupe kriminale e u arrestuan 350 zyrtarë publik, dikur kishim korrupsion shumë e pak zhurmë- sot ka ngelur vetëm zhurma

Prishtinë 9 Dhjetor 2025 08:45

Prishtinë- Kryeministri në detyrë i Kosovës, Albin Kurti, në adresimin e tij me rastin e Javës kundër Korrupsionit, ka thënë se gjatë qeverisjes së tij afro 5-vjeçare janë shkatërruar 146 grupe kriminale, janë arrestuar 350 zyrtarë publikë e janë konfiskuar 6.7 tonë drogë.

Ai tha se kur morën mandatin, korrupsioni nuk ishte thjesht perceptim por realitet, raporton “Betimi për Drejtësi“.

“Ishte një sistem i ngritur për t’i mbrojtur dhe pasuruar zyrtarët e korruptuar. Politikanët e korruptuar, ju i larguat me votë, kurse ne e çmontuam sistemin që i mbronte ata”, u shpreh Kurti.

Kurti tha se ndryshuan kornizën ligjore dhe deponuan qindra lëndë në prokurori. Tha se miratuan pakon e ligjeve kundër korrupsionit të ndërlidhur me të ardhurat, dhuratat dhe deklarimin e pasurisë së zyrtarëve publikë.

“Qartësuam mandatin e Agjencisë për Parandalimin e Korrupsionit dhe miratuam dy herë Ligjin për Byronë shtetërore për konfiskimin e pasurisë së pajustifikueshme”, tha Kurti.

Në këto 5 vite, ai thotë se jemi përmirësuar për 31 vende në indeksin kundër korrupsionit ose për 6 vende çdo vit.

Të ngjajshme
5 Nën, 2025, 15:56
Ai ka thënë se janë shkatërruar 23 laboratorë të drogës, prej tyre 13 në veri të vendit. Tha se u mbyllën 10 objekte të laboratoreve ilegale të kriptovalutave. Po ashtu, tha se janë ndalur veprat super-korruptive të qeverisjeve të kaluara.

Kryeministri në detyrë ka thënë se është rritur edhe ekonomia nga 7 në 12 miliardë euro, e është zvogëluar papunësia nga 26 për qind në më pak se 11 për qind. Ndërkaq, tha se u rrit edhe buxheti i shtetit nga 2.4 miliardë në 4 miliardë euro.Ai kritikoi Gjykatën Kushtetuese për bllokim të reformave.

“Rezultatet do të ishin më të mira po të mos bllokohej reforma antikorrupsion nga Gjykata Kushtetuese, sidomos Byroja shtetërore për konfiskimin e pasurisë së pajustifikueshme. Por, siç e thotë populli kjo vetëm vonim se shpëtim nuk ka”, tha Kurti.

Sipas tij, me marrjen e mandatit të ri, do ta miratojnë Strategjinë kundër korrupsionit. Tha se do të sigurohen që gjyqtarët dhe prokurorët do ta përdorin SMIL për ndarjen e lëndëve.

“Dikur kishim shumë korrupsion e më pak zhurmë për prezencën e tij. Ai nuk luftohej sepse shteti ishte i kapur. Sot kur ekonomia e buxheti i shtetit është shtuar me miliarda, kur janë luftuar e larguar abuzuesit e homologimeve, asfaltimeve e terminaleve, duke kursyer qindra miliona, ka ngelur, vetëm zhurma. E më të zhurmshmit janë ata që kanë humbur më së shumti”, tha Kurti.

Në këtë javë, ai thotë se riafirmojnë angazhimin e tyre për një shtet të drejtë, transparent dhe të përgjegjshëm.