Kurti: Kosova drejt shndërrimit në qendër rajonale të industrisë së drurit

Prishtinë 26 nëntor 2025 15:53

Kryeministri në detyrë i Kosovës, Albin Kurti, ka bërë thirrje për më shumë bashkëpunim, inovacion dhe zhvillim në sektorin e përpunimit të drurit, gjatë adresimit të tij në Edicionin e 8-të të Konventës së Industrisë së Drurit 2025, të organizuar nga Shoqata e Përpunuesve të Drurit të Kosovës – Wood Cluster (SHPDK).

Në fjalën e tij, Kurti u shpreh se Qeveria është e përkushtuar të jetë “partner i bizneseve”, duke theksuar investimet në arsim profesional dual, digjitalizim të shërbimeve, inovacion, makineri moderne, rritje të kapaciteteve eksportuese dhe standarde të qëndrueshme të menaxhimit të pyjeve.

Ai theksoi se produktet “Made in Kosova” po fitojnë terren në tregjet evropiane e rajonale, si garanci e cilësisë dhe jo kompromis i saj. Sipas tij, vizioni i Qeverisë është që Kosova të shndërrohet në qendër rajonale të prodhimit të mobileve dhe të produkteve të drurit.

Kurti vuri në pah se Kosova kryeson në rajon për përmirësim të lirive, demokracisë dhe qeverisjes, duke e bërë vendin më të besueshëm për bashkëpunim e investime. Ai përmendi edhe vlerësimin e ‘Gallup International’, sipas të cilit Kosova renditet vendi më i sigurt në Evropë dhe i treti në botë për rend dhe siguri, çka, sipas tij, paraqet një sinjal të qartë për partnerët ndërkombëtarë.

Kurti nënvizoi përkushtimin e Qeverisë për krijimin e një mjedisi më të favorshëm për bizneset, me më pak barriera dhe më shumë mundësi, çka ndihmon kompanitë e drurit dhe të prodhimit të mobilieve të zgjerohen drejt tregjeve të huaja dhe të tërheqin investime të reja.

Në këtë Konventë, ku Kurti mori pjesë bashkë me ministren në detyrë të Industrisë, Ndërmarrësisë dhe Tregtisë, Rozeta Hajdari, u mblodhën përfaqësues të bizneseve, institucioneve, universiteteve, donatorëve dhe ekspertëve vendorë e ndërkombëtarë për të diskutuar zhvillimin, inovacionin dhe të ardhmen e sektorit.