Parandalohet futja e sendeve të kundërligjshme në Dubravë

Prishtinë 24 Nëntor 2025. 16:24

Shërbimi Korrektues i Kosovës (ShKK) ka njoftuar se sot se gjatë një bastisjeje të realizuar në Qendrën Korrektuese të Dubravës, është parandaluar futja e sendeve të kundërligjshme në institucion.

Aksioni i koordinuar thuhet se u zhvillua në bashkëpunim me institucione të sigurisë dhe Njësinë e Kontrollit të Interventës dhe Kërkimit (NJIK), dhe rezultoi i suksesshëm në ndalimin e tentativës për kontrabandë.

Gjatë bastisjes në zonën sterile të institucionit, zyrtarët korrektues kanë identifikuar tre pako të dyshuara që përmbanin sasi të dyshuara narkotike, katër telefona celularë pa numra serik, dy telefona iPhone, një telefon Samsung dhe një Viko, si dhe dy adapterë telefoni.

Materialet e gjetura janë sekuestruar nga policia, e cila është njoftuar për ngjarjen, ndërkohë që Shërbimi Korrektues i Kosovës ka nisur hetimet përkatëse për zbardhjen e plotë të rastit.