Forcimi i sundimit të ligjit përmes bashkëpunimit ndërmjet prokurorive të Kosovës dhe Shqipërisë

Prishtinë, 4 nëntor 2025

Një sistem funksional me bashkëpunim të ndërjelltë, është garanci e forcimit të sundimit të ligjit në Kosovë dhe Shqipëri, kështu u konstatua sot në një takim zyrtar në mes të U.D të Kryeprokurorit të Shtetit të Kosovës, Besim Kelmendi dhe atij nga Republika e Shqipërisë, Oslian Çela, gjatë vizitës zyrtare që prokurorët e shtetit shqiptar po i bëjnë këto ditë Kosovës.

U.D. Kryeprokurori Kelmendi njoftoi delegacionin nga Tirana për funksionimin e sistemit prokurorial, e në veçanti për funksionimin e Prokurorit të Shtetit, për strukturën organizative, për kompetencat e prokurorive, si dhe për sfidat me të cilat ballafaqohet sistemi prokurorial në realizimin e misionit për sundim të ligjit.

“Gjatë këtij takimi u riafirmua angazhimi i përbashkët institucional në funksion të forcimit të sundimit të ligjit në të dyja shtetet, si dhe u diskutua për ngritjen e nivelit të bashkëpunimit, koordinimin dhe efikasitetin në luftën kundër krimit në të dyja shtetet”, thuhet në njoftimin e prokurorisë.

Më tej bëhet e ditur se palët u pajtuan se forcimi i bashkëpunimit dhe koordinimit ndërmjet dy prokurorive në fushën e drejtësisë penale është thelbësor për përballimin e sfidave të përbashkëta dhe trajtimin e çështjeve me interes të ndërsjellë.