Vuçiç përpiqet ta minimizojë protestën, ndërkohë barrikadon me forca policore Novi Sadin

Prishtinë, 1 nëntor 2025

Studentë serbë, të cilëve u janë bashkuar edhe mijëra qytetarë të tjerë, janë nisur në marsh drejt Novi-Sadit për protestën më të madhe që synojnë ta organizojnë kundër pushtetit të Aleksandër Vuçiqit. E Vuçiqi, që protestat i sheh si komplot të Perëndimit kundër tij, ka paralajmëruar veprimin e policisë.

Dhjetëra e mijëra studentë e qytetarë serbë kanë nisur marshin drejt Novi-Sadit, në protestën që pritet të jetë më e madhja kundër pushtetit të Aleksandër Vuçiqit. Organizimi bëhet në njëvjetorin e vdekjes së 16 qytetarëve, nga çatia e një stacioni hekurudhor që u shemb pak kohë pas rinovimit.

Protestat, të cilat fillimisht nisën për të kërkuar llogari nga pushteti për këtë tragjedi, u shndërruan shpejt në lëvizje masive që kërkojnë zgjedhje të parakohshme dhe reforma të mëdha demokratike.

E kur u pyet nga një gazetar për përkujtimin e së shtunës, Vuçiq është përpjekur ta ulë rëndësinë e protestës, tek ka theksuar se nuk do të ketë ndryshim të qeverisë.

Vuçiq ka kërcënuar me arrestime masive nëse protestuesit përdorin dhunë dhe ka thënë se mbështetësit e tij po planifikojnë një tubim që e ka quajtur “shumë më të madh” më vonë në nëntor.

E, gjatë ditës, policia ka arrestuar në Novi-Sad, Misha Baçullovin, politikan opozitar që e kundërshton Vuçiqin, dhe aktivist në protestat kundër tij. Mediat pro presidentit serb raportuan se arrestimi u bë nën dyshimin se Baçullovi ka planifikuar të inskenojë helmimin e vet dhe më pas ta akuzojë Vuçiqin dhe zyrtarë të tjerë shtetërorë për këtë.

Gjatë marshit, protestuesit u ndalën në qytetin e Indijas ku ngritën tenda.

“Dhimbja qe e kemi sot nuk është asgjë në krahasim me qëllimet tona. E kaluam natën këtu, në tenda. Por ishte më mirë sesa kemi menduar. Nuk jemi lodhur. Askush nuk është lodhur. Do të vazhdojmë marshin sot”, ka theksuar Mina Lazic, studente e cila i është bashkuar marshit.

Shumica e protestave të organizuara deri tani kanë qenë paqësore. Por ka pasur edhe incidente të shkaktuara nga mbështetësit e Vuçiqit, ndërsa policia ka arrestuar qindra protestues.

Kësaj radhe pritet që njerëzit të organizojnë tubime të ndara në Novi-Sad, formulë që besohet se do ta bëjë më të vështirë ndërhyrjen e policisë, krahasuar me një tubim të vetëm qendror.

Incidenti tragjik i 1 nëntorit të 2024-s u është atribuuar neglizhencës së qeverisë, korrupsionit të përhapur dhe marrëveshjeve të dyshimta me kompani kineze ndërtimi që morën pjesë në rinovimin e stacionit të trenit.

Megjithatë, Vuçiq ka thënë se protestat janë komplot i Perëndimit për ta larguar nga pushteti.