Kurti në Forumin e Paqes në Paris: Kosova, histori suksesi e ndërhyrjes humanitare të NATO-s

Prishtinë 30 Tetor 2025

Kryeministri në detyrë i Kosovës, Albin Kurti, ishte i ftuar në diskutimin me temë “Paqeruajtja në një udhëkryq: E ardhmja e misioneve të OKB-së dhe përgjegjësia globale”, organizuar në kuadër të Forumit të Paqes që po mbahet në Paris.

Në fjalën e tij, kryeministri Kurti theksoi se Kosova përfaqëson një histori të dyfishtë suksesi: së pari, si shembull i ndërhyrjes ushtarake dhe humanitare të NATO-s që ndaloi gjenocidin e kryer nga Serbia, dhe së dyti, si një shtet ku zhvillimi dhe demokracia ecin krah për krah.

Ai shtoi se, me forcimin e institucioneve shtetërore ndër vite, është ulur gradualisht prania ushtarake ndërkombëtare në vend, ndërsa njëkohësisht është rritur progresi ekonomik.

“Sot Kosova ka Bruto Produkt Vendor (BPV) për kokë banori gjashtë herë më të lartë se në vitin 2000 dhe tri herë më të lartë se në vitin e shpalljes së pavarësisë, më 2008. Kosova duhet të shërbejë si shembull se çlirimi dhe pavarësia sjellin edhe përfitime makroekonomike e sociale për të gjithë qytetarët,” thuhet në komunikatën e Zyrës së Kryeministrit.

Kurti theksoi se çdo mision paqeruajtës ka nevojë për vlera të përbashkëta, e jo vetëm për interesa të përbashkëta, duke nënvizuar rëndësinë e multilateralizmit, dialogut, negocimit, pajtueshmërisë dhe arritjes së marrëveshjeve.

Në këtë kuptim, ai përmendi modelin e Bashkimit Evropian si një projekt politik dhe proces historik të paqes dhe prosperitetit.

Duke iu përgjigjur pyetjeve të pjesëmarrësve, kryeministri foli edhe për forcimin e shtetësisë së Kosovës në arenën ndërkombëtare, duke përmendur tri njohjet e reja që vendi ka marrë gjatë këtij viti, si dhe aspiratat për integrim në Bashkimin Evropian dhe NATO, krahas rëndësisë së bashkëpunimit rajonal.

A A
Komisioni Evropian ka qëllim të heqë më tej masat financiare ndaj Kosovës, nëse pas raundit të dytë të zgjedhjeve lokale, në veri arrihet një transfer i rregullt i qeverisjes dhe deeskalimi mbetet i qëndrueshëm. Kjo thuhet në draft-raportin e progresit për Kosovën, të cilin Komisioni Evropian pritet ta publikojë më 4 nëntor.

Sipas burimeve diplomatike, kjo nënkupton bartje të qetë të pushtetit dhe marrje të detyrës nga kryetarët e rinj të komunave në veri.

Raporti i progresit, dokumenti më i rëndësishëm që përpilon Komisioni Evropian për vendet e zgjerimit, në rastin e Kosovës nuk evidenton përparime të rëndësishme. Përkundrazi, ai konstaton progres të kufizuar apo përparim të pjesshëm në shumicën e fushave – vlerësime që konsiderohen përgjithësisht të ulëta.

Sa i përket situatës në veri, raporti kritikon veprimet e autoriteteve të Kosovës, të cilat, siç thuhet, kanë qenë në kundërshtim me obligimet e vendit ndaj Bashkimit Evropian dhe me procesin e normalizimit të marrëdhënieve me Serbinë, raporton RTK.

Sipas gjetjeve të dokumentit, dialogu ka qenë i penguar për shkak të situatës politike si në Kosovë, ashtu edhe në Serbi. Në këtë kuadër përmendet se Serbia nuk ka ndërmarrë masa ndaj autorëve të sulmit në Banjskë, ngjarje që ka shënuar përshkallëzimin më të madh të sigurisë.
Në kapitullin politik, drafti vëren se viti i kaluar është karakterizuar nga përçarje të brendshme politike dhe fushatë konfrontuese në prag të zgjedhjeve të përgjithshme. Po ashtu, theksohet se kjo situatë është ndjekur nga ngërçi politik, si pasojë e mungesës së vullnetit apo paaftësisë së partive politike për të gjetur zgjidhje drejt krijimit të institucioneve.

Kosova gjithashtu kritikohet në fushën e lirisë së shprehjes, ku, sipas draftit, nuk është shënuar asnjë përparim. Raporti përmend sfidat lidhur me transparencën e pronësisë së mediave dhe qëndrueshmërinë e tyre financiare, si dhe sulmet ndaj gazetarëve, përfshirë pengimin në kryerjen e detyrës dhe sulmet verbale nga zyrtarë të lartë qeveritarë.