21 organizata të shoqërisë civile i drejtohen Presidentes Osmani: Të parandalohet kriza buxhetore dhe institucionale

Prishtinë 28 Tetor 2025

Një grup prej 21 organizatash të shoqërisë civile i janë drejtuar me letër publike Presidentes së Republikës së Kosovës, Vjosa Osmani, duke kërkuar ndërhyrjen e saj për të shmangur një krizë të mundshme buxhetore dhe institucionale në vend, pas dështimit të formimit të Qeverisë së re.

Në letrën e publikuar më 28 tetor, organizatat shprehin shqetësimin e tyre për mungesën e marrëveshjes politike ndërmjet partive kryesore parlamentare dhe paralajmërojnë se vendi po shkon drejt zgjedhjeve të reja, pa miratimin e buxhetit të vitit 2026 dhe pa ratifikimin e Marrëveshjeve me Bashkimin Evropian për Planin e Rritjes.

“Vendi po shkon drejt zgjedhjeve të reja parlamentare. Në këto rrethana të ndjeshme për stabilitetin institucional dhe ekonomik të vendit, ndjejmë detyrimin qytetar e profesional që t’ju drejtohemi me shqetësimet tona mbi situatën aktuale dhe me disa propozime konkrete për tejkalimin e saj,” thuhet në letrën e përbashkët.

Organizatat paralajmërojnë se mosmiratimi i buxhetit para fundvitit mund të paralizojë pagesat për mësimdhënësit, mjekët, administratën publike dhe përfituesit e ndihmave sociale. Po ashtu, theksojnë se vonesat në ratifikimin e marrëveshjeve me BE-në po e pengojnë Kosovën të përfitojë fondet e parapara nga Plani i Rritjes.

Në këtë kontekst, ato i bëjnë thirrje Presidentes Osmani që të ndërmjetësojë një marrëveshje politike midis partive parlamentare për të siguruar funksionimin bazik të shtetit deri në zgjedhjet e reja.

“Ju bëjmë thirrje që të ndërmerrni iniciativë për ndërmjetësim politik, duke ftuar partitë parlamentare që të gjejnë një zgjidhje të përkohshme e funksionale për çështjen e buxhetit dhe marrëveshjeve në fjalë, para se të shpërbëhet Kuvendi aktual dhe vendi të shkojë në zgjedhje,” theksohet në letrën drejtuar Presidentes.

Ndër propozimet konkrete të organizatave janë që Qeveria në detyrë të dorëzojë në Kuvend projektligjin për buxhetin e vitit 2026, ose që Kuvendi aktual të votojë një zgjatje të buxhetit të tanishëm deri në fund të marsit të vitit të ardhshëm, për të garantuar stabilitetin financiar.