Përfundon me sukses trajnimi i ushtarakëve të FSK-së në Ferizaj, në bashkëpunim me ushtrinë amerikane

Prishtinë 18 Tetor 2025

Në Komandën e Doktrinës dhe Stërvitjes (KDS) në Ferizaj, kanë përfunduar me sukses “Kursi për Staf të Betejës” dhe “Kursi për Rreshter të Drillit”, të organizuar dhe realizuar nga Ekipet e Organizatës për Menaxhimin e Trajnimit dhe Asistencë të Sigurisë të Ushtrisë së Shteteve të Bashkuara të Amerikës (SATMO).

Ministri në detyrë i Mbrojtjes, Ejup Maqedonci, vlerësoi rëndësinë e këtyre trajnimeve si një hap të rëndësishëm drejt profesionalizimit dhe ngritjes së kapaciteteve të FSK-së në përputhje me standardet e NATO-s.

“Në Komandën e Doktrinës dhe Stërvitjes në Ferizaj (KDS) përfunduan “Kursi për Staf të Betejës” dhe “Kursi për Rreshter të Drillit” të organizuar dhe realizuar nga Ekipet e Organizatës për Menaxhimin e Trajnimit dhe Asistencë të Sigurisë të Ushtrisë së SHBA-ve (SATMO). Kursi i Stafit të Betejës ka mision kryesor zhvillimin Nënoficerëve të Stafit të FSK-së në Procesin e Vendimmarrjes Ushtarake (PVMU), zhvillimi i sinkronizimit të stafit në funksionet luftuese dhe avancimi i proceseve të komandimit dhe kontrollit për operacionet në nivel batalioni dhe brigade. Ndërsa “Kursi për Rreshter të Drillit” ka për qëllim të trajnojë dhe përgatisë pjesëtarë për instruktorë të drillit efektiv të cilët do jenë përgjegjës për transformimin e rekrutëve të rinj në ushtarë të disiplinuar, fizikisht të përgatitur dhe të aftë në taktika”, ka shkruar Maqedonci.