Kurti për rritjen ekonomike: Politikat tona po ndikojnë pozitivisht

Prishtinë 18 Tetor 2025

Kryeministri në detyrë, Albin Kurti ka thënë se Kosova po kthehet në një storie suksesi për rritje ekonomike, teksa ka paralajmëruar se vendi ynë do të ketë sërish rritjen më të lartë nga shtetet e rajonit.

“Vit pas viti Kosova po bëhet storie suksesi për rritje ekonomike. Vendi ynë përsëri do ta ketë rritjen më të lartë ekonomike në rajon, sipas projeksioneve të FMN-së. Politikat ekonomike dhe masat e ndërmarra gjatë qeverisjes sonë po ndikojnë pozitivisht në progresin dhe zhvillimin e shtetit”, ka shkruar Kurti në Facebook, teksa ka shpërndarë një postim të mbrëmshëm të ministrit në detyrë të Financave, Hekuran Murati, i cili theksoi se pavarësisht sfidave dhe krizave globale, Kosova do të arrijë rritje ekonomike të lartë pa e thelluar deficitin buxhetor apo borxhin publik.

“Sipas raportit më të fundit të FMN-së, Kosova edhe sivjet do ta ketë rritjen ekonomike më të lartën në rajon. Kjo do të arrihet përkundër sfidave e krizave globale, si dhe duke mos e thelluar deficitin apo borxhin publik. Kjo edhe njëherë e dëshmon se politikat e Qeverisë Kurti funksionojnë dhe njëkohësisht demanton të gjithë ata që prognozonin të kundërtën”, ka shkruar Murati.

E ndaj postimit të djeshëm të Muratit reagoi ish-ministrja e Financave dhe shefja e Grupit Parlamentar të LDK-së, Hykmete Bajrami, e cila ka krahasuar normat e rritjes së sotme me ato të viteve të mëhershme. “Atëherë kur deputeti Murati dhe bashkëpartiakët e tij rrokullisnin kamionë dhe gjuanin gaz lotsjellës në Kuvend, rritja ekonomike ishte më e lartë se sot, ndërsa inflacioni pothuaj i pavërejtshëm. Sot rritja e Hekuran Muratit është 3.9%, por inflacioni në shtator ishte 4.7%”, ka shkruar Bajrami.