Mesazhet kërcënuese në veri – Sveçla: Potenciali për destabilizim nuk ekziston

Prishtinë, 03 shtator 2025

Ministri në detyrë i Punëve të Brendshme, Xhelal Sveçla  duke folur për mesazhet kërcënuese në veri ka thënë se janë pjesë e luftës hibride si dhe destabilizimit.

Ai në një deklarim për Tëvë1 ka thënë këto veprime bëhet edhe për të friksuar qytetarët serb që janë lojal ndaj shtetit të Kosovës.

“ Kjo është luftë hibride me qëllim që situata në Kosovë të mos përmirësohet edhe më tutje. Janë kapsolla të destabilizimit, qoftë politik qoftë të sigurisë. Por poashtu bëhen që popullata ynë e etnisë serbe në një mënyrë apo tjetrën për disa të inkurajohet e për disa të frikësohen, grupi i dytë lojal ndaj Republikës së Kosovës, duke tentuar të shfaqin prezencë n e tyre në Kosovë”, ka thënë Sveçla.

Ai ka thënë se grupe të tilla nuk kanë potencial për destabilizim. “Unë po e them prapë që potenciali i tyre për destabilizim nuk ekziston duke qenë se institucionet e Kosovës janë fuqizuar në atë pjesë të Republikës. Por ne të gjitha këto provokime, të gjitha incidentet sado minore të jenë ne i marrim jashtëzakonisht seriozisht, përgatitemi dhe i përgjigjemi me nivel adekuat”, ka thënë ai.

Në mbrëmjen e së martës në rrugën “Vasilije Ostrovski” në Mitrovicën e Veriut, është hasur një shkrim kërcënues në mur, i adresuar kryeministrit në detyrë të Kosovës, Albin Kurti.