Kurti uron nxënësit për fillimin e vitit të ri shkollor

Prishtinë, 01 shtator 2025

Kryeministri në detyrë, Albin Kurti, ka uruar nxënësit që sot filluan vitin e ri shkollor, duke e quajtur ditën e parë të klasës së parë një moment të veçantë për çdo fëmijë dhe prind.

“Dita e parë e klasës së parë është një ditë e veçantë për çdo fëmijë dhe çdo prind. Këtë vit shkollor, në nivel vendi janë afër 25 mijë fëmijë që nisin mësimet në klasën e parë, që takojnë mësueset e mësuesit e tyre dhe që fillojnë miqësitë e para me shokët e shoqet e klasës dhe gjeneratës”, ka thënë Kurti.

Ai bëri të ditur se bashkë me ministren e Arsimit, Arbërie Nagavci, vizituan nxënësit e klasës I/1 të shkollës “Hasan Prishtina” në Prishtinë.

“Bashkë me ministren e Arsimit, Shkencës, Teknologjisë dhe Inovacionit, Arbërie Nagavci, vizituam nxënësit e klasës I/1 të shkollës ‘Hasan Prishtina’ në Prishtinë, me mësuese Drita Bashota, dhe i uruam përzemërsisht fillim të mbarë e rrugëtim të suksesshëm përgjatë gjithë shkollimit”, u shpreh ai.

Kurti i ka inkurajuar mësimdhënësit që të jenë sa më afër nxënësve.

“I inkurajoj të gjithë mësimdhënësit që të jenë sa më afër fëmijëve dhe nxënësve, sepse në moshat e hershme dashuria e mësuesit dhe mësueses është jo më pak e vlefshme sesa ajo e prindërve. Dashamirësia që tregojmë për të tjerët dhe për ta bëhet faktor shumë i rëndësishëm për zhvillimin dhe edukimin e tyre”, ka thënë ai.