Spastrimi etnik i heshtur në jug të Serbisë përmes çregjistrimit të adresave

Bujanoc, 31 gusht 2025 – Në jug të Serbisë po ndodh një spastrim etnik i heshtur ndaj shqiptarëve, i kryer përmes një mekanizmi administrativ që lidhet me çregjistrimin e adresave, vlerëson gazetari dhe aktivisti holandez për të drejtat e njeriut, Jan Jansen.

Sipas tij, sistemi i trashëguar nga ish-Jugosllavia i ka dhënë policisë kompetenca të gjera mbi administrimin e adresave. Kur emigrantët shqiptarë që punojnë jashtë vendit kthehen rrallë në shtëpitë e tyre, policia bën kontrolle dhe, duke mos gjetur askënd, i çregjistron ata nga evidenca. Kështu, qytetarët humbin të drejtat ligjore në Serbi, shpesh pa dijeninë e tyre, deri në momentin kur u nevojitet ndonjë dokument zyrtar.

Në një rast, Gjykata Kushtetuese e Serbisë konfirmoi çregjistrimin e një shqiptari nga Medvegja, duke e lënë atë pa asnjë shtetësi. Komiteti i Helsinkit për të Drejtat e Njeriut në Serbi ka cilësuar këtë si spastrim etnik të sistematizuar.

Edhe pse shqiptarët e Luginës së Preshevës kanë protestuar përmes institucioneve komunale dhe organizatave të tyre, deri tani nuk ka pasur ndryshime. Ardita Sinani, kryetare e Preshevës, ka raportuar shkeljet e të drejtave të shqiptarëve edhe para Senatit amerikan.

Jansen thekson se ndërhyrja ndërkombëtare, veçanërisht nga Evropa, është e domosdoshme. Ai e quan situatën asimetrike, pasi Serbia kërkon të drejta për serbët në Kosovë, ndërkohë që ua mohon ato shqiptarëve brenda kufijve të saj.