AKKVP: 57 prona në veri iu kthyen pronarëve legjitimë

27 gusht, 2025

Agjencia Kosovare për Krahasim dhe Verifikim të Pronës (AKKVP) ka bërë të ditur se tashmë 57 prona në pjesën veriore të Kosovës u janë rikthyer pronarëve të tyre të ligjshëm. Ky rezultat është arritur falë funksionimit prej dy vitesh të zyrës rajonale në veri, e cila është njëra nga pesë që operon në kuadër të Agjencisë.

Projekti i bartjes së pronësisë, i cili përfshin të gjitha zonat kadastrale dhe ofrohet falas, u mundëson qytetarëve që nuk kanë pasur mundësi ta formalizojnë pronën e tyre nga viti 1945 deri në vitin 1999, të kërkojnë njohjen dhe bartjen ligjore të saj.

Zyrtari përgjegjës në KPCVA në Mitrovicë, Erblin Macula, tha se falë ndryshimeve pozitive në këtë pjesë të vendit është lehtësuar puna për lirimin e pronave të uzurpuara. Ai konfirmoi se deri tani janë kthyer rreth 56–57 prona, për të cilat janë zbatuar vendimet ligjore.

Ndërkaq, Arianit Buqaj, zyrtar në këtë institucion, theksoi se të gjithë ata qytetarë që kanë blerë pronë para vitit 1999, por nuk kanë mundur ta formalizojnë transaksionin, tani kanë të drejtë të paraqesin kërkesë për njohjen e së drejtës pronësore.

Agjencia u ka bërë thirrje qytetarëve që ende nuk e kanë të rregulluar pronën në emër të tyre, të shfrytëzojnë këtë mundësi, duke theksuar se krahas faqes zyrtare, AKKVP funksionon edhe përmes pesë zyrave rajonale në Kosovë.