Osmani në Forumin Alpbach: Kosova si kontribuese aktive për paqe dhe siguri

24 gusht, 2025

Presidentja e Kosovës, Vjosa Osmani, ka marrë pjesë në Forumin Evropian Alpbach në Austri, ku është takuar me të rinj e të reja që ajo i cilësoi si udhëheqësit e ardhshëm të Evropës. Përmes një postimi në Facebook, Osmani ka ndarë momente nga ky diskutim, duke theksuar se temë kryesore ishte roli i Kosovës si kontribuese aktive për paqe dhe siguri.

“Diskutuam për rolin e Kosovës si kontribuese aktive për paqe e siguri, për rëndësinë e bashkëpunimit transatlantik, si dhe për rikthimin e Evropës tek forca jonë më e madhe: mbrojtja e vlerave demokratike. Jo vetëm në fjalë, por në veprim”, ka shkruar Osmani.

Ajo ka shtuar se me guximin për të qëndruar krah atyre që mbrojnë këto vlera dhe për t’i hapur dyert Kosovës dhe shteteve të tjera që punojnë me përkushtim për to, Evropa forcon unitetin dhe sigurinë e saj.